Ўзбекистон Республикаси Президентининг 2017 йил 14 февралдаги "2017-2018 йилларда минтақавий автомобиль йўлларини ривожлантириш дастурини амалга ошириш чора-тадбирлари тўғрисида"ги қарорида Республикадаги минтақавий ички йўллар билан бир қаторда умумий фойдаланувдаги автомобиль йўлларини қуриш ва реконструкция қилишнинг янгиланган дастури ҳам тасдиқланган эди.

Жумладан, мазкур қарорнинг 5-иловасида 2017-2018 йиллар мобайнида Республикадаги умумий фойдаланувда бўлган 540 км йўллар қурилиши ҳамда реконструкция қилиниши кўзда тутилган бўлиб, улар орасида М-37 "Самарқанд-Бухоро-Туркманбоши" автомобиль йўлининг 30 километрдан иборат қисми ҳам бор.

Шу кунларда мазкур магистрал йўлининг 116-126 километрлари оралиғи тўлиқ реконструкция қилинди. Узунлиги 10 км дан иборат мазкур объект таъмири тўлиқ равишда Ўзбекистон Республикаси Автомобиль йўллари Давлат қўмитаси таркибидаги корхона ва ташкилотлар томонидан бажарилди. Яъни, буюртмачи - "Умумий фойдаланишдаги автомобиль йўлларини қуриш ва реконструкция қилиш дирекцияси" ДУК, бош пудратчи ташкилот эса – Навоий вилоят Кармана туман йўллардан фойдаланиш унитар корхонаси ҳисобланади.

Алоҳида қайд этиш керакки, 4 тасмадан иборат ҳамда эни 25,1 метрни ташкил этган йўл оралиғидаги 3 та кўприк ҳам қайта қурилди. Шунингдек, мазкур автомобиль йўлидаги 14 дона автобус бекатлари ҳамда 10 км узунликдаги электр тармоқлари ҳам янгиланди.

Мазкур объектнинг фойдаланишга топширилиши – йўлсозларнинг мустақиллигимизнинг 26 йиллигига тайёрлаган ўзига хос совғаларидан бири ҳисобланади.

Автомобиль йўллари давлат қўмитаси

матбуот хизмати